கூடு கட்டத் தெரியாத குயில்கள்

ஒரு ரசனைக் குறிப்பு

ஒரு படைப்பாளி தனது படைப்பை வெளிப்படுத்தப் பயன்படுத்தியருக்கும் மொழியானது ஒரு தேர்ந்த வாசகனைத் திருப்திப்படுத்துமாக இருந்தால் அப்படைப்பு ஐம்பது வீதம் வெற்றி பெற்றதாகி விடுகிறது. சிறப்பாகச் சொல்லப்பட்டிருக்கிறது என்கிற நிலையை எட்டுமாக இருந்தால் அப்படைப்பு முழு வெற்றியை நோக்கியிருப்பதாகக் கூறலாம்.

இந்த இரண்டு நிலைக்குமான பிரிகோட்டுக்கு மத்தியில் சில கதைகளும் பிரிகோட்டுக்கு மேலும் கீழுமாகச் சில கதைகளும் ‘கூடுகட்டத் தெரியாத குயில்கள்’ என்ற மருதூர் ஏ. மஜீத் அவர்களின் அண்மையில் வெளி வந்த சிறுகதைத் தொகுதியில் இடம்பெற்றிருக்கின்றன.

1979ல் இவரது முதல் சிறுகதைத் தொகுப்பான ‘பன்னீர் வாசம் பரவுகிறது’ வெளிவந்த போது அதன் வாசம் முழு இலங்கையிலும் பின்னர் தமிழகத்திலும் பரவியிருந்ததைப் பலர் மூலம் அறிய முடிந்தது. அத்தொகுப்பில் இடம் பெற்றிருந்த ‘பன்னீர் வாசம் பரவுகிறது’ என்கிற கதையானது வேறு சிலருக்கும் பின்னாளில் கதைகளுக்கான சார்புக் கருவாக மாறியிருந்ததை ஒரு மூத்த படைப்பாளி மூலம் நான் அறிய வந்தேன்.